يحدث في مترو الانفاق (1)

يحدث في مترو الانفاق (1)

النهاردة راجع من المحكمة قلت اركب المترو علشان اوصل البيت بسرعة ..

الجو حر والشمس حامية والشوارع زحمة فاكيد المترو هيكون ارحم..

ركبت من محطة جمال عبد الناصر الشهيرة بالاسعاف الجو في محطة المترو - تحت الارض - غير بره المترو .. الجو تحت كله رطوبة وريحة عرق وانفاس مكتومة المهم قلت استحمل كلها اتناشر محطة بس واوصل البيت..

اتجهن ناحية اتجاه المرج ورحت شباك التذاكر اقطع تذكرة لقيت زحمة على الشباك علشان الموظف بتاع التذاكر مش معاه فكة كله واقف بقى مستني اي زبون يقطع تذكرة ويكون معاه فكة ..

الحمد لله كان معايا جنيه جبت بيه تذكرة ..ورحت ناحية الماكينات الخاصة بالتذاكر .. ادخل التذكرة في الفتحة المخصصة مش راضية جربت ماكينة تانية برضو ما فيش استجابة ..فيييييين عقبال ما لقيت ماكينة شغالة عديت منها ..

استنيت المترو شوية عقبال ما وصل .. لقيت زحمة على الابواب..

اللي جوه القطار بيحاولوا ينزلوا واللي على الرصيف بيحاولوا يركبوا !!!مافيش نظام خالص !!! واللي بيزيد الطين بلة ان السواق عمال يطلق صفير يستعجل به الركاب علشان كده كل الناس متسربعة كله خايف انه ما يقدرش ينزل في محطته او ان المترو يفوته..

رحت ناطط وسط الزحمة لقيت نفسي جوه المترو وما ادراك ب(جوه المترو) اولا المراوح عطلانة ، ثانيا الناس لازقين في بعضهم على الرغم من الحر والرطوبة الشديدتين ..وبعض الناس بيستغلوا الموضوع ده اسوا استغلال خصوصا بعض الشباب الرقيع ممن لا يتقي الله !!!

واللي يغيظ انك تلاقي عربيات السيدات هادية ورايقة ممكن السيدات يقفوا فيها براحتهممن غير ازعاج .. وفي نفس الوقت تلاقي باقي العربيات اغلبها من الفتيات والنساء !!!

سالت واحد عن السبب في الموضوع ده قالي :

- يا عم دول لو ركبوا عربيات الحريم هايفضلوا واقفين كتير وماحدش هايقوملهم .. اما هنا فتلاقي الواحدة تقعد تتزنق في وا حد وتنفج وتشهق في وشه لحد ما يزهق ويقرف ويقوم سايبلها الكرسي تقعد عليه براحتها ..او واحد يصعب عليه شابة فيه واحد عمال يعاكسها او يضايقها فيروح قايملها ومقعدها مكانه بشهامة ..انما هما ماتلاقيش فيهم واحدة تقوم علشان تقعد واحدة تانية ابدا ...دول اصلا مابيطيقوش بعضهم ..

المهم فضلت مستحمل القرف دا كله ووصل المترو الى محطة المطرية ..لقيت واحد راصص صناديق على رصيف المحطة واول ما فتح الباب بتاع المترو راح زاقق الناس وقعد ينقل الصناديق- هو وواحد تاني - من الرصيف للقطار !!! اندهشت لان ممنوع اصلا ان اي حد ينقل صندوق او كرتونة عن طريق المترو وان فيه غرامة عشرة جنيه على الموضوع ده !!!

عرفت ان البيه واللي معاه موظفين في المترو وبينقلوا الكراتين دي لمحطة تانية ..

المهم الراجل قاعد يرمي الصناديق لجوة المترو من غير مراعاة للناس اللي واقفة انا شخصيا الصناديق وقعت على رجلي كذا مرة وكانت ثقيلة فعلا ..وكمان كان فيه اطفال وافين والله وهما ولا هاممهم المهم الناس بتكلم الموظف وتقوله براحة شوية.. لقيناه عمال يزعق ويهلل قال ايه عاوزنا نساعده !!!

طب يا عم الحاج انت اولا ما طلبتش مساعدة ثانيا احنا لقيناك عمال ترمي علينا الصناديق من غير سلام ولا كلام وبعدين عاوز الناس تساعدك ؟!!!!

المهم سائق المترو فضل مستني الموظفين لحد ما خلصوا تحميل وبعدين طلع بالمترو ..

اتجهت لناحية باب اخر للنزول في محطة عين شمس ولما نزلت ببص لقيت البارد قصدي الموظفبيرص الصناديق فوق بعضها وسادد الباب بالكراتين!! والناس اتجهت للابواب الاخرى.. قلت في بالي اعاقب الموظف ده وازقله الكراتين دي اوقعهاله علشان اتعبه زي ما تعب الناس ..

لسه هاروح انفذ اللي في دماغي لقيت المترو قفل الباب وبيتحرك ..

قلت قدر الله وما شاء فعل ربنا رحمه مني ...

او يمكن رحمني من اللي كان ممكن يجرالي ...

اظن ان الموضوع ممكن يتبع .. لانه اكيد هيكون ليه اجزاء ..