قــاطـــع - بقلم : خالد الطبلاوي

مش معقولة مش معقولة

نشرب بيبسي أو كوكا كولا

وصهاينة تكسب وتحوش

وتقدم لحمنا للغولة

مش معقولة مش معقولة

-*-*-*-

مش معقولة نشتري إيريال

دا احنا لا هبل ولا بنريل

مهما ينضف مش هنميل

دا احنا دماغنا ماهش مخبولة

مش معقولة مش معقولة

-*-*-*-

ياللي بتغفل ياللي بتنسي

ياللي بتشتري لابنك شيبسي

مهما يقولوا معانا جوايز

رد عليهم أنا مش عايز

دول بيبيعوا الضل قزايز

واحنا فهمنا خلاص الفولة

مش معقولة مش معقولة

-*-*-*-

إعلان تلفزيون وجرايد

بتقول لك تغسل بالتايد

وإسرائيل هـ تلم العايد

هيَّ دي تبقى يا خلق رجولة

مش معقولة مش معقولة

-*-*-*-

سيبك م البامبر والألويز

لو حتى مدامك هتبوز

انتاج بلدك ممكن ينجز

ما تبعش خواتك بسهولة

مش معقولة مش معقولة

-*-*-*-

ياللي بتفرح بسفن أب

شوف قرشك قاتل كام أب

من انتاجنا يا ناس خدوا بالكو

قضوها عصير ولا سينالكو

وعوا حريمكم صحو عيالكو

نهزم أعداءنا بسهوله

ونعود للأمجاد الأولى

كده معقوله

كده معقوله

-*-*-*-

http://www.mnfonline.com/detailes.php?cat=19